PULAU COA, THE LOST ISLAND

Tempat-tempat legendaris Baturaja masa lalu...

Lame sebelum PDAM--perusahaan ayah ye mengalirkan ayah embau kaporit ke huma-huma kite--Pulau Coa mungkin sikok-sikoknye bada jeme Baturaje ngunjali ayah untuk jumlah banyak. Endai pulau inilah dulu ayah diambek bedrum-drum dan dinaikkan ke mubil. Baek untuk sedekah maupun untuk usaha es balon atau es lilin.

Selain itu, di Pulau Coa pule jeme baturaje dan sekitarnye manco mubil-mubil atau motornye. Di tahun 1983 sekali manco atau mandikan mubil ukuran truk ongkos jasenye 300 rupiah. Bandingkan gok rege miso yang waktu itu mase 50-100 rupiah. Hala harap mubil jadi wangi kene "shampoo" lok jeme manco mubil di "car wash" mak ini ahi. Waktu itu, mubil cuma disimbohi gok ember sampai berse. Ye tukang nyimbohinye juge kanye jeme besak, tapi budak-budak kecek ye nyakah duit buat tambahan jajan di sekolah.

Tentera Belande tahun 1949 di pinggir ayah Ugan, tepatnye di Tanjung Agung, parak Pulau Coa.

Foto: T. (Tassilo) Adam (Fotograaf/photographer). Koleksi TropenMuseum Belanda

Pulau Coa sebenahnye bukanlah pulau ye kite bayangkan muncul di tengah-tengah laut, danau atau sungai. Tapi lebih ke bentuk daratan ye menjorok ke tengah-tenngah ayah. Terletak di Kampung Kebun Jati, Saung Nage, tepatnye di parak bawah jeramba rel sepur baru mak ini ahi. Dulu, akses ke sana relatif dek sare. Maklum, lokasinye mase kebun dan elum dipadati huma-huma warge. Selain itu, pulaunye juge mase landai dan dekde betebing lok mak ini ahi. Dengan hamparan batu-batu krikil ye luas dan pacak menampung belasan mubil, pulau ini jege menjadi rami amen petang ahi. Umumnye, mubil-mubil ye nak dibanco ngundang budak-budak kecek. Alasanye, sambil husek di ayah ugan, budak-budak kecek pacak diandalkan untuk nyimbohi mubil-mubil ye kama.

Sayang, Pulau Coa mak ini cuma tinggal name. Krikil-krikil landai ye dulu bada manco mubil lah tegerus gok tanah-tanah belumpur dan betebing. Hikmahnye, ayah Ugan dekde agi tercemari gok minyak-minyak mubil ye tumpah. Tapi sisi lain, bada husek budak dulu jadi tinggal kenangan. Pulau COa jadi pangkalan sunyi....